Skjálftinn er hæfileikakeppni ungmenna í grunnskólum á Suðurlandi. Skjálftinn er litli bróðir Skrekks, hæfileikakeppninnar sem haldinn hefur verið fyrir ungmenni í grunnskólum Reykjavíkurborgar í meira en 30 ár! Sunnlendingum þótti kominn tími til að fleiri ungmenni fengu þetta frábæra tækifæri sem felst í því að taka þátt í Skrekk og bjuggu því til Skjálftann í góðu samstarfi við Reykjavíkurborg. Skjálftinn var haldinn í fyrsta sinn 15. maí 2021 og að þá var grunnskólum í Árnessýslu, 10 samtals, boðin þátttaka en draumurinn var alltaf að allir skólar á Suðurlandi taki þátt og sá draumur rættist árið 2023.  

Framkvæmdastjóri Skjálftans er Ása Berglind Hjálmarsdóttir.  Skjálftinn er alfarið háður styrkjum og þátttökugjaldi skólanna svo hann standi undir sér. Skjálftinnn er samfélagslegt verkefni með sjálfbærni að leiðarljósi, búinn til með það að markmiði að hafa jákvæð áhrif á samfélag og menntun ungmenna. Skjálftinn er ekki hagnaðardrifinn. Reksturinn gengur út á það að allir sem að honum koma fái greitt fyrir sína vinnu og hægt sé að greiða allan kostnað.

Það er einlæg von Skjálftans og Skrekks að fleiri hæfileikakeppnir byggðar á Skrekk spretti upp víðar um landið og inn á þessari síðu má nálgast leiðbeiningar um það hvernig hægt er að innleiða samskonar verkefni. Árið 2022 varð Fiðringurinn á Norðurlandi til þar sem norðlensk ungmenni fá að njóta sín.